मिल जुलकै नया हरयाणा हम घना आलिशान बनावांगे||
ना बराबरी खत्म करकै नै हरयाणा आसमान पहोंचावांगे ||
बासमती चावल हरयाने का दुनिया के देशां मैं जावै आज
चार पहियें की मोटर गाड़ी यो सबतें फालतू बनावै आज
खेल कूद मैं हम आगै बढ़गे एसिया मैं सम्मान बधावांगे ||
चोरी जारी थाग्गी नहीं रहवैन्गी भ्रष्टाचार नहीं टोह्या पावै
मैरिट तैं मिलैं दाखिले सबनै शिक्षा माफिया खड्या लखावै
मिल सारे हरयाणा वासी इन बाताँ नै परवान चढ़ावांगे ||
ठेकेदारां की ठेकेदारी ख़त्म होज्या ख़त्म थानेदारी होज्या
बदमाशों की बदमाशी ख़त्म होज्या ख़त्म फेर ताबेदारी होज्या
निर्माण और संघर्ष का नारा यो लगाके नै जी ज्यान उठावांगे||
दहेज़ खातिर दुखी होकै औरत नहीं फांसी खा हरयाणा मैं
कदम बढ़ाये एक बै आगै हटके ना पाछै जाँ हरयाणा मैं
बराबर का दर्जा देकै नै बंद कलियाँ के अरमान खिलावांगे ||
छुआ छूत का नहीं नाम रहै सब रल मिलकै रहै गामाँ मैं
प्यार मोहब्बत त्याग तपस्या सब कुछ झलकै कहैं गामाँ मैं
दिखा नया रास्ता समाज नै बिना बात का घमासान मिटावांगे||
हरयाणा के लड़के और लड़की कन्धे तै कन्धा मिला चालैंगे
देकै क़ुरबानी ये छोरी छोरे नए हरयाणा की नींव डालैंगे
गीत रणबीर सिंह नै बनाया मिलके मजदूर किसान गावांगे ||
