देवर भाभी की तकरार

देवर भाभी की तकरार 
देवर --  म्हारी परंपरा सै घूँघट म्हारी इज्जत सही बताया ॥ 
भाभी --इस घूँघट नै महिला कै यो बैरियर कसूत  लगाया ॥ 
देवर --बिन घूँघट कोए बहु किसी भाभी मनै बताईए  री 
          या घूँघट की रीत पुराणी इसनै तो तूँ अपनाईये री 
           म्हारे बड़े बडेरयाँ नै कदे पूरा समाज यो समझाया ॥ 
भाभी - पांच इन्द्री ज्ञान लेन की इस दुनिया मैं गयी बताई 
            स्पर्श करकै सूंघ करकै होसै ज्ञान की वृद्धि जताई 
            देख करकै सुन करकै चाट कै होसै ज्ञान सवाया ॥ 
देवर - घूँघट गेल्याँ के रिश्ता भाभी पांच इन्द्रियां का बता 
          लाज म्हारी सै घूँघट भाभी तारैगी तो होवेगी खता 
          लिहाज शर्म पूरे गाम की यो घूँघट संस्कृति दिखाया ॥
भाभी -इसका रिश्ता इन्द्रियां तैं मनै तो साफ़ दिखाई देवै सै 
          पाँच मैं तै चार जकड़ ली या महिला कैसे ज्ञान लेवै सै 
           रणबीर नै घूँघट के खिलाफ हरियाने मैं झंडा ठाया ॥